He Kupu Tuku Iho - He Pūrongo
Nō Te Ipukarea te honore ki te taunaki i te putanga o tēnei o ngā taonga tongarerewa nā ngā Ahorangi Hōnore, nā Tā Tīmoti Kāretu rāua ko Tākuta Wharehuia Milroy. He pātaka tuhinga a He Kupu Tuku Iho: Ko te reo Māori te tatau ki te ao, e titiro ana, e kōrero ana i ngā kaupapa whai take ki te ao Māori, mai i te oranga tonutanga o te reo Māori ki ngā mahi a Rēhia, te reo ngahau, ngā tikanga, te aha atu hoki.
E whai ake nei ko tētehi pūrongo pukapuka e whakanui ana i ngā kōrero a ngā mātanga nei. He wiki i pau katoa ai ngā tānga tuatahi, ā, i tēnei wā e tāngia anō he terenga tuarua.
Kei te tākuta, Hana O'Regan, e mihi ana!
E poho kererū ana a Te Ipukarea i te whakawhiwhinga o Hana O'Regan ki tana tohu kairangi i tēnei wiki. Ko Ahorangi Tānia Ka'ai tana kaiārahi.
Kua hau ngā rongo o Tākuta O'Regan ki te motu, ā, ki tāwāhi hoki, i āna mahi whakarauora reo. Ko ia hoki tētahi o ngā kaiurungi o te rautaki reo o Ngāi Tahu e kīia ana ko "Kotahi mano kāika, kotahi mano wawata". Ka mutu, kua eke ia hei Pou-whakahaere ā-oranga mō tōna iwi.
I te mutunga iho, nō Te Ipukarea te hōnore i tana kaha tautoko mai i ā mātou tini kaupapa i roto i ngā tau, mai i ngā kaupapa rangahau tae atu ki ā mātou kaupapa hapori, pēnei i tā mātou whakataetae tito kōrero ā-motu mō ngā tamariki, arā, He Huata Auaha (i noho ia hei kaiwhakawā). Ko Tākuta O'Regan hoki tētahi o ngā mātanga tautoko o Te Whare o Rongomaurikura.
Kua roa a Tākuta O'Regan e whakaheke werawera ana i te ao whakarauora reo, ā, ka herea tēnei tohu hei tikitiki mō tōna mahunga.
Kei te manawa tītī o te pūwharetāiko o Tahu, nei rā ngā whakamiha a ō hoa, a Te Ipukarea, e rere atu nei. Ko āu rangahau ka tiakina hei kuru pounamu mō tō iwi, otirā mō tātou, mō te iwi Māori whānui tonu.
Tiki ake te tuhinga kairangi a Tākuta Hana O'Regan ki raro iho nei:
"Te tīmataka mai o te waiatataka mai o te reo."
Te Reo o te Pā Harakeke - He Pōhirihiri
E pōhiri atu nei a Te Ipukarea ki ngā matua me ngā whaea o te motu e whakatupu tamariki kōrero Māori ana kia whakaarotia tēnei kaupapa rangahau, e kīia nei ko Te Reo o te Pā Harakeke. He kaupapa rangahau e arohaehae ana i ngā piki me ngā heke o te whakatū kāinga kōrero Māori.
Tēnā tirohia te pānui matua mō ngā whakamārama, me te puka whaipānga ki te hiahia tūhono mai.
Ngā Hui o Āpōpō
Kāore kau he hui.