Whāinga

Kia whakamāoritia he pukapuka nui whakahirahira kua tuhia e ētahi kaituhituhi Māori ki te reo Pākehā me te tuhi hoki i ētahi tuhituhinga hou i roto i te reo Māori ngā whāinga matua o tēnei kaupapa. Ko ngā pukapuka kua whiriwhirihia: ko Purapurawhetū nā Briar Grace-Smith i tuhi, ā, ko Tū nā Patricia Grace i tuhi. Ko Te Ohorere rāua ko Wiremu Kaa ngā kaiwhakamāori.

Tirohanga whānui

Kāore i te rahi ngā momo tuhinga i roto i te reo Māori. Me whitawhita tātou ki te whakamāori, ki te tuhi anō hoki i roto i te reo Māori. Koia nei ngā mahi kua whakaritea:

• Te whakamāori i ētahi pukapuka nui whakahirahira nā ētahi kaituhi nō Aotearoa, ahakoa he kōrero pono, he pakimaero, he tuhinga mō tētahi mahi whakaari rānei.
• Te whakarite i ētahi kōrero ā-waha me te hopu i aua kōrero hei rokiroki kia pāohotia mā te ipurangi.

Kua oti rānei te whakarite ngā mahi nei?

Kua tīmatatia. Kua tohungia ngā tuhinga, ā, kua kōrero ki ngā kaituhi, ki ngā kaitā me ngā tāngata, rōpū rānei kei a rātou te manatārua. I tīmata ngā kaiwhakamāori ki te whakamāori mai i ngā pukapuka i te marama o Hōngongoi i te tau 2010, ā, ka oti i te tau 2011.

Mā wai e taki ngā mahi?

E arahina ana tēnei kaupapa e Tania Ka‘ai, e Te Ihorei o Te Ipukarea.