Whāinga

Ko te hanga i ētahi rauemi mō te ipurangi me te rorohiko hei tautāwhi i te ako i te reo Māori te whāinga matua o tēnei kaupapa. Mā ēnei rauemi mō te reo Māori ka waia haere anō hoki ngā ākonga me ngā kaiako ki te whakamahi i te rorohiko me ngā momo taru paoho (arā ngā iPod, ngā iPhone, ngā mp3 me aua momo taputapu hou) kia tere ake ai te ako i te reo. He utu kore ēnei rauemi katoa.

Tirohanga whānui

Ka hangaia ētahi rauemi mō te ipurangi me te rorohiko mō ngā pukapuka o Te Whanake, mai i ngā pukapuka mō te ākonga kātahi anō ka tīmata ki te ako tae noa ki te ākonga kua āhua matatau ki te kōrero me te tuhituhi i te reo Māori. Ka kohia ngā reo kei runga i ngā rīpene whakarongo me ngā kōpae ki te taha o ngā whakaahua me ngā tohutohu o ngā pukapuka matua ki te wāhi kotahi hei kōnae ipurangi, arā hei rokiroki. (He kupu te ‘kōnae ipurangi’ me te ‘rokiroki’ mō te mea e kīia nei i te reo Pākehā he podcast.) Mā ēnei rokiroki ka ngāwari te ako, ā, ka taea e te ākonga ngā rauemi reo te hari ki te tī, ki te tā ako ai. Ka taea anō hoki e ngā ākonga ā rātou mahi te hopu me te tuku atu mā te rorohiko ki ō rātou kaiako. Ka taea anō hoki e ngā kaiako ngā mahi a ā rātou ākonga te whakatikatika, te aromatawai me te arataki mā te rorohiko me te ipurangi.

Kua oti rānei te whakarite ngā mahi nei?

Kua oti kē.

Tākiri mai te ata ki runga i te rangi mātāhauariki mō te reo! Kua whai mata hou ngā rauemi ako reo nei i runga i te angitu o ngā tau kua hipa.  He ōrite te whāngai o ngā rauemi, iripāoho mai, whakaaturanga mai, engari mā te mata hou o ēnei rauemi e aumangea ai tātou i tō tātou ako i te reo Māori.  Kua tuwhera he whare hou, kua ao anō he rangi mātāhauariki hou, nau mai, haere mai e ngā tauira marea o te reo!

Nā wai ngā mahi?

Nā Tānia Ka‘ai rāua ko John Moorfield ētahi ākonga i ārahi hei whakaoti i tēnei mahi. Nā Hohepa Spooner i tohutohu, i whakangungu hoki.